قال عضو تكتّل “الجمهورية القوية” النائب بيار بو عاصي رداً على رئيس التيار الوطني الحر جبران باسيل إن “كل مرّة بقول ما بدّي رد عليك وإذ بتطلع بنظريات ديماغوجية غريبة عجيبة بتجبرني حطلك النقط عالحروف. رح ينشّفوا النقط ويخلصوا الحروف وانت بعدك ملنّص. وحياتك بدّي كرمالك.”
وأضاف في منشور عبر صفحته على “فايسبوك”: “شرّفت على بعبدا لافتتاح بيت شباب التيار وطرقت خطاب مش معروف رأسه من كعبه. متل العادة. حسّيتك خليفة تشرشل الواقف وحده بوج النازية. طلع معك انّو الكون كلّه ضدّك وانت صامد وثابت دفاعاً عن المبادئ والقضية. الحمدالله نسيت خبريّة القبطان والسفينة…”.
وتابع بو عاصي: “جبران، عزيزي، اذا كنت مصاب بجنون العظمة أو عقدة الاضطهاد لازم تتعالج وبأسرع وقت. وحياتك ما بدّي إلا صالحك. وحياتك. معقول ما يكون عندك لا شغلة ولا عملة الّا تنحت تماثيل لشخصك الكريم العظيم وتنزل كومبليمونات وتبويس بحالك؟ خفّفلي نحت وتبويس. أما إذا كنت مدمن على الكذب، خفّف شوي شوي، معك معك، وهيك بتتخلّص من هالآفة الخطيرة. بتاخد وقت، خاصة بحالتك. وحياتك صحّتك بالدني”.
وقال: “طوشتنا بقضيتك وبالمبادئ يلّي مستعد لأغلى التضحيات كرمالن. الله بوفقك قلّنا شو هنّي وكيف دافعت بشراسة عنهم. ما يكون تسكير المجلس بالتكافل والتضامن مع “الحزب” والرئيس برّي لمدة سنتين ونصف حتى انتخاب الرئيس المؤسس، داخل باحترام الدستور وتحديداً المادة ٧٤؟ ما تكون هي ياها كل القضية، لا دستور ولا قوانين ولا من يحزنون. لعبة سلطة وبسّ”.
