أعلن رئيس حزب “القوات اللبنانية” سمير جعجع, اليوم الثلاثاء, خلال احتفال في معراب, عن مرشحي “القوات” في زحلة عن المقعدين الارثوذكسي والكاثوليكي.
وخلال الاحتفال قال جعجع: “من الامور يلي بتعز عليي اخر عامين هي غيابي عنكن وتعذر لقائي فيكن بقلب زحلة وبإحيا زحلة وبساحاتا وقاعاتا يلي رسمنا فيا خطط كبيرة ومشاريع اكبر، ومنها انطلقنا بمقاومتنا للمحتل، وللفاسدين
وأضاف, “زحلة كانت محطة اساسية إلي كل سنة، وباذن الله رح ارجع كون معكن عن قريب ومن جديد بساحات زحلة. بتعرفو ليش بحب إطلع عا زحلة من وقت للتاني؟ أكيد مش تا أعمل سياسة، بس لأنّو بحب إطلع شوف زحلة وشوارعها وأهاليا وكل شي فيا”.
وتابع, “زحلة بكل محطة وكل مرحلة وكل مفترق مصيري للبلد كانت وبتكون عاصمة المقاومة اللبنانية ومنبع النخوة والشجاعة والشهامة, زحلة عرين الاسودة يلّي طلّعت الأسد برّا، ورح تكفّي على كل يلي تركلنا ياهن وراه”.
وعن الانتخابات النيابية, قال: “انتخابات 2022 مش فرصتنا نا نطلّع نايب بالزايد. انتخابات 2022 هيي فرصتنا نا نسترجع لبنان، لبنان اللي اشتقنالو: لبنان البحبوحة ولقمة العيش الكريمة، لبنان العزة والكرامة، لبنان مستشفى الشرق وجامعتو، لبنان مقصد السوّاح وموضع ثقة المستثمرين”.
وأشار إلى أنّ, “وقت لي منحكي عن هيك لبنان ما فينا الا ما نتذكر رفيق الحريري لان على ايامه عشنا هل لبنان”.
وتابع, “اشتقنا نرجع نحس أنّو عنّا دولة مش دكّانة وأنّو دولتنا بتحمينا، وأنّو دولتنا منعتزّ فيا برّا وبكل دول العالم، وما منستحي نقول أنّا من لبنان. واشتقنا اكتر شي نخلص من الفلتان وقدّ المراجل يللي صاير بالداخل، والخارج كمان. واشتقنا نقول النشيد الوطني ونكون عم نعيش كل كلمة فيه”.
ولفت جعجع إلى أنّ, “تفاهم مار مخايل خرب لبنان. تفاهم ما مخايل بالحقيقة ما إلو علاقة بمار مخايل. إلو علاقة بالشياطين اللي كان داعسون مار مخايل. هالتفاهم شتت العيل، وغرّب الناس وحرمن أبسط مقومات العيش، وأخد لبنان عا جهنّم يللي نحنا فيه اليوم”.
وقال: “حذرناهن مرّات ومرّات وسخّرنا طاقاتنا كلها تا نوعّيهن عالمخاطر يلّي معقول تهدد لبنان اذا كفّوا بسياساتن, بدل الورقة قدمنالن وراق، وبدل المشروع قدمنالن مشاريع، وبدل الحوار شاركنا معن بحوارات, بس بدل ما يسمعو للبنانيين واوجاعون ويستفيدو من طروحاتون وطروحاتنا، سمعوا للإيرانيين ، وما فكّروا إلاّ بمصالحون. ولليوم ورغم كل الضرر ورغم الانهيار، بعدن مستمرين بمشروعن التدميري وبعدن لليوم ما عملو شي ولا رح يعملو أيّ شي”.
وأضاف جعجع, “شعب لبنان رسم حدود وطنو بنضالو وتضحياتو ودمّو, من هيك رح يفلّو هنّي، ورح يبقى شعب لبنان، ويبقى لبنان بلد الحرية والعيش الكرم والديمقراطية”.
وأردف, “للتعبير في طريقتين: إمّا الشارع أو صندوقة الاقتراع، بالشارع فينا نعبّر وبس، بس بصندوقة الاقتراع فينا نعبّر ونغيّر. وهيدا هدفنا بأيار 2022: نغيّر لأنّو إذا ما غيّرنا، رح نكفي نزول الى ما لا نهاية. من هون اهمية انتخابات 2022 من هون اهمية انتخابات 2022 ومش معقولي يكون في معركة هالقد مصيرية وهالقد كبيرة وهالقد محقة وما تكون زحلة بوسطا (بعزّا) وبصلبها”.
وتابع, “اهلي واخوتي ورفيقاتي ورفاقي بزحلة، لبنان بحاجة لكل واحد منّا، بدنا سوا نخوض معركة التغيير وبدنا سوا نرجع نحط لبنان عا سكة الانقاذ. وهالانقاذ بدو يكون من خلال اشخاص مشهود الن، نزيهين محترمين مخضرمين قادرين يحملو همومكن، منتميين لمجموعة كبيرة قادرة تحمل مشروع الإنقاذ المطلوب”.
واستكمل, “من هالمنطلق وبعد المشاورات بزحلة وبالهيئة التنفيذية بحزب “القوات اللبنانية”، تمّ إتخاذ القرار بترشيح ابن زحلة، المحامي الأستاذ الياس اسطفان، عن المقعد الأرثوذكسي في دايرة زحلة. الياس اسطفان زحلاوي بامتياز ومحامي لامع، وبالوقت يلي كتار عم يضطروا يفلو ويتركو اهلون وقرابينون، الياس اسطفان، يللي كان ببلاد الغربة لسنين طويلة، عم يرجع تيكون بين اهلو بخدمة الناس تا يساهم من خلال ثقتن، وبصفوف القوات اللبنانية، بمعركة الإنقاذ المطلوبة”.
ومن ثمّ توجَه جعجع إلى الحاضرين بالقول: “اخوتي واهلي ورفيقاتي ورفاقي بزحلة، جورج عقيص والياس اسطفان قادرين من خلال ثقتكم يوضعو زحلة بصلب القرار الوطني وتكون زحلة متل العادة حاملة الراية بمعركة الإنقاذ الجايي. القرار الكن اليوم، بعرفكن منيح وبعرف انكن رح تاخدو القرار الصح، وبعرف انكن رح تشكّلو مفاجأة لكل يلي مراهن على انو الشعب اللبناني تعب وقرف وما عاد قادر عالمواجهة”.
وختم رئيس حزب “القوات اللبنانية” سمير جعجع كلمته قائلًا: “اتكالنا عليكن، واذا الله راد منرسم سوا بـ١٥ ايار أحلى صورة عن زحلة، وعن القوات، وعن الديمقراطية، وعن كيف الشعوب بتصنع التغيير